Абранне Анатоля Ляўковiча старшынём Беларускай сацыял-дэмакратычнай партыi (Грамада) на з’ездзе 3 жнiўня выклiкала пратэсты як унутры партыi, так i ў апазiцыйным асяродку. Прычына ў тым, што А.Ляўковiч змянiў на гэтай пасадзе палiтвязня Аляксандра Казулiна, якога з’езд прызначыў ганаровым старшынём Грамады. Мiж тым, з’езд Грамады дэ-юрэ замацаваў сiтуацыю, якая склалася Грамадзе дэ-факта: i да, i пасля з’езда фактычным кiраўнiком партыi з’яўляўся Анатоль Ляўковiч, Анатоль Ляўковiч прадстаўляў БСДП (Грамада) у стасунках з АДС.

Былыя палітвязнi, да прыкладу, прынялi адмысловую заяву, у якой выказалi «рашучы пратэст дзеянням Анатоля Ляўковіча і ягонай каманды…”.

Як ацэньваюць кадравае рашэнне партыi-партнёра калегi па А’бяднаных дэмакратычных сiлах? Цi не адабецца кадравае прызначэнне на сiтуацыi ўнутры АДС?

Пра гэта разважае старшыня Аб’яднанай грамадзянскай партыi Анатоль Лябедзька.

-Я не з’яўляюся дарадцам сацыял-дэмакратычнай партыi, нi са мной, нi з партыяй нiхто не кансультаваўся. Кадравыя рашэннi – гэта ўнутраная справа партыi, у нашым выпадку – Грамады.

Iншая справа, што час для кадравых перамен выбраны не самы лепшы. Зараз трэба займацца парламенцкай кампанiяй, а не высвятляць адносiны ўнутры партыi цi памiж асобамi, памiж асобнымi палiтыкамi. Спадзяюся, што рашэнне, прынятае з’ездам БСДП (Грамада), не прывядзе да чарговага драблення партыi, кланiравання сацыял-дэмакратычных партый.

На жаль, сiтуацыя насамрэч такая, што хутка колькасць сацыял-дэмкратычных партыяў у Беларусi можа параўнацца з колькасцю сацыял-дэмакратаў.

Што датычыць каалiцыйнай супрацы, то мы працуем не з асобамi, не з лiдэрамi – мы працуем са структурамi. З Беларускай сацыял-дэмакратычнай партыяй (Грамада) мы працавалi, працуем i – спадзяюся – будзем працаваць. Мы зыходзiм з пазiцыi: моцныя суб’екты – моцная каалiцыя. Калi кадравыя рашэннi спрыяюць узмацненню партыi – за кошт лiдэраў, цi за кошт iншых складнiкаў – такiя перамены мы толькi вiтаем.