7 кастрычнiка лiдэры АДС мелi сустрэчу з дзейным старшынём АБСЕ міністрам замежных спраў Фінляндыі Аляксандрам Стубам. Гаворка, безумоўна, iшла пра парламенцкую кампанiю, пра супрацоўнiцтва Еўропы i Беларусі ў святле чарговай «элегантнай перамогi», дасягнутай рэжымам у час парламенцкай кампанii.

Вынiкi сустрэчы каментуе старшыня Беларускай сацыял-дэмакратычнай партыi (Грамада) Анатоль Ляўковiч.

-Старшыня АБСЕ прэзентаваў не толькi сваю пазiцыю, але, вiдаць, пазiцыю Еўропы – трэба супрацоўнiчаць, у тым лiку i з рэжымам. Я таксама лiчу, што ў iнтарэсах усiх бакоў гэтае супрацоўнiцтва патрэбнае, але супрацоўнiцтва – на ўмовах.

Паводле негалоснай дамовы Еўропы з Мiнскам, дасягнутай перад выбарамi, Еўропа гатовая была iсцi на прызнанне гэтага рэжыму – пры выкананнi шэрагу ўмоваў. Аднак Мiнск па-свойму згуляў сваю гульню; згуляў у шахматы, але дошкай па галаве, як гуляў Астап Бендэр у Васюках.

Безумоўна, Еўропа гiстарычна зацiкаўленая ў супрацоўнiцтве з Беларуссю, якая зяўляецца транзiтнай краiнай у цэнтры Еўропы. Але як наладжваць стасункi з Беларуссю, якая не жадае выконваць свае абавязацельствы?

Мне здаецца, добра лягла на палiтычную сiтуацыю iдэя не адмяняць санкцыi супраць кiраўнiцтва краiны, а проста часова прыпынiць дзеянне гэтых санкцый. У абмен, зразумела, на пэўныя ўмовы. Гэтую iдэю на сустрэчы агучыў лiдэр Партыi камунiстаў Беларускай Сяргей Калякiн.

Еўропа ў развiццi сваiх стасункаў з Мiнскам прайшла праз два этапы, i цяпер, вiдавочна, мы выходзiм на трэццi.

Першы этап – поўная iзаляцыя Беларусi – плёну не дала; другi этап – iзаляцыя толькi рэжыму i супрацоўнiцтва з дэмакратычнай апазiцыяй, з дэмакратычнай Беларуссю – таксама не дала чаканых вынiкаў. Цяпер мы выходзiм на трэцi этап – супрацоўнiцтва не толькi з дэмакратычнай грамадскасцю, але i з рэжымам. З пункту гледжання гiстарычнай перспектывы, гэта правiльна. I я лiчу, што супрацоўнiчаць трэба, але супрацоўнiчаць на ўмовах. Еўропа можа часова прыпынiць дзеянне санкцый у адносiнах да вышэйшага кiраўнiцтва Беларусi, але пры гэтым Еўропа мусiць выставiць пэўныя ўмовы рэжыму.

Таму iдэя не адмяняць, а часова прыпынiць дзеянне санкцый, на мой погляд, лягла на палiтычную сiтуацыю, якая цяпер iснуе ў Беларусi.