Сёння завяршыўся трохдзённы візіт у Вялікую Брытанію аднаго з лідэраў дэмакратычных сіл Беларусі Аляксандра Мілінкевіча.

Як перадае прэс-служба палітыка, ён наведаў гэтую краіну па запрашэнні Міністэрства замежных спраў Вялікабрытаніі. Самай важнай з шэрагу размоў у Лондане, якіх было каля двух дзесяткаў, А.Мілінкевіч называе перамовы з брытанскім міністрам па справах Еўропы Джэфам Гунам, які лічыцца адным з самых набліжаных людзей да магчымага новага прэм’ера Брытаніі Гордана Браўна.

— Гаварылі аб пазіцыі Еўрасаюзу, — расказаў Мілінкевіч. — Там ідзе дыскусія пра тое, ці ня варта без усялякіх умоваў пачаць супрацоўніцтва з беларускімі ўладамі. Я думаю, што гэта памылка. У Лондане падзяляюць такі пункт гледжання. Яны лічаць, што ў дачыненні да дыктатуры палітыка павінна быць маральнай. І таму павінны выконвацца вядомыя ўмовы, якія даўно сфармуляваныя.

Гаварылі таксама пра адносіны з Расіяй. У Брытаніі ўсё менш надзеяў на тое, што ў Расіі хутка будзе дэмакратыя. І пагаршэнне сітуацыі там для ўсіх відавочнае. І хаця, безумоўна, дачыненні з Расіяй трэба будаваць і дэмакратычным сілам Беларусі, але сёння дэмакратызацыя Беларусі праз усходнюю суседку — гэта ілюзорны праект.

Мілінкевіч спадзяецца, што ягоны візіт у Вялікабрытанію дасць канкрэтныя вынікі — найперш для рэпрэсаваных студэнтаў і людзей, якія сталі беспрацоўнымі з-за сваёй палітычнай дзейнасці.

— Высокія палітыкі, на ўзроўні якіх вырашаюцца такія пытанні, казалі, што яны будуць вельмі сур'ёзна разглядаць магчымасці выдзялення стыпендыяў для пацярпелых студэнтаў, — сказаў ён. — І таксама падтрымкі беспрацоўных. Я ўпэўнены, што яны выканаюць абяцанні. Бо Брытанія — гэта краіна, дзе палітыкі вельмі сур'ёзна ставяцца да сваіх абяцанняў.