Як заявіў у інтэрв'ю "Товарищу" П.Севярынец, які сёння быў умоўна-датэрмінова вызвалены судом у Наваполацку, на дадзены момант нейкія рэальныя дзеянні адбываюцца толькі ў нацыянальным руху — "гэта хрысціяне, якія праводзяць кампанію па збору подпісаў за змяненне закона аб свабодзе сумлення, "Малады фронт", грамадзяне, якія ўдзельнічаюць у вулічных акцыях".

— На жаль, у апошні год склалася сітуацыя, калі апазіцыя сама сабе, а нацыянальны рух — сам сабе, — адзначыў П.Севярынец. — У дзейсным супраціве рэжыму расколу няма, чаго не скажаш пра бюракратычную эліту апазіцыі.

На думку П.Севярынца, Кангрэс дэмакратычных сіл найбольш патрэбны менавіта кіруючай эліце сістэмнай апазіцыі, для мэтаў нацыянальнага руху яго "гарадзіць не трэба". А вось кіраўніцтва партый будзе высвятляць адказы на пытанні: "Хто галоўны? Хто вінаваты? Што рабіць?", лічыць палітык.

Паводле П.Севярынца, сведчаннем таго, што Кангрэс дэмакратычных сіл будзе кангрэсам больш партыйным, ёсць тое, што 21 мая Палітрада АДС выступіла супраць удзелу ў КДС так званых VIP-персонаў: прадстаўнікоў інтэлігенцыі, былых палітыкаў, навукоўцаў, палітвязняў, найбольш актыўных абаронцаў намётавага гарадку на Кастрычніцкай плошчы ў сакавіку 2006 года. На думку Севярынца, удзел нацыянальнай эліты ў КДС усё ж мог бы дапамагчы пераадолець "мяжу, што падзяляе партыйную бюракратыю і нацыянальную інтэлігенцыю".

— Для большасці людзей у нацыянальным руху, уключаючы нават Малое Сітна (вёска, дзе адбываў пакаранне П.Севярынец — "Товарищ".), Аляксандар Мілінкевіч — уяўнае ўвасабленне лідэра супраціву, — сказаў П.Севярынец. — Пры ўсёй маей павазе да лідэраў партый, лічу, што правядзенне цяпер Кангрэса не мае вялікага значэння.