Лічыць сябра Сойма Партыі БНФ Валянціна Свяцкая

У юнацтве для мяне Першамай быў сапраўдным святам. Таму што гэта вясна, гэта вяселле, жарты, песні. Свята моладзі, свята духу.

Праўда, калі я пачала працаваць у камітэце камсамолу, а потым у парткаме, мне даводзілася рыхтаваць гэтае свята, а затым кіраўніцтва рабіла разбор "палётаў", таму было ўжо не так весела.

Цяпер, на жаль, гэтае свята на дзяржаўным узроўні зрабілася штучным, бо тая ж самая дзяржава дэвальвавала шмат рэчаў... Права на працу ў Беларусі прадэкларавана Канстытуцыяй, але гэты артыкул выконваецца ў адносінах не да ўсіх грамадзян нашай краіны. Умовы кантрактнай сістэмы, калі чалавек можа згубіць сваё працоўнае месца ў любы момант, на жаль, не дазваляюць у гэты дзень радавацца ад усяго сэрца за працоўных. Ёсць рэчы, якія замінаюць святкаваць гэты дзень...

Але ўсім, хто адзначае Свята працы, у першую чаргу нашым калегам па кааліцыі, хачу пажадаць выдатнага надвор'я, добрага настрою, кахання, натхнення, здароўя, каб ладзілася ўсё ў сем'ях і на працы, а галоўнае — поспехаў у нашай агульнай барацьбе за волю!